Is iad na soláthraithe leictreachais agus ESB Networks a dhéanfaidh an Scéim um Shochar Éigeandála Costais Leictreachais a fheidhmiú. Is é an Coimisiún um Rialáil Fóntas a dhéanfaidh maoirseacht ar an scéim. Beidh Soláthraithe Leictreachais freagrach as €114.68 (gan CBL a áireamh) a chur do shochar chuntas gach custaiméara leictreachais tí incháilithe.
Chun bheith ag cloí leis an Acht um Chostais Leictreachais (Bearta Éigeandála) i leith Cuntais Tí, 2024, cuirfidh soláthraithe leictreachais na creidmheasanna le gach cuntas de chuid sealbhóirí cuntais leictreachais baile atá cláraithe le soláthraí leictreachais i bPoblacht na hÉireann ar na dátaí seo a leanas:
30 Deireadh Fómhair 2024 don tréimhse íocaíochta Samhain-Nollaig.
20 Nollaig 2024 don tréimhse íocaíochta Eanáir-Feabhra.
Is iad na custaiméirí a bheidh incháilithe ná custaiméirí cláraithe a bhfuil MPRN (uimhir thagartha mhéadarphointe) acu atá aicmithe mar DG1 (custaiméirí tí uirbeacha) nó DG2 (custaiméirí tí tuaithe) ar na dátaí thuasluaite agus nach n-aithnítear iad mar chuntas atá ar leibhéal íseal úsáide (seachas eisceachtaí faoi leith). Is féidir teacht ar an rangú DG a bhaineann le do MPRN ar leathanach tosaigh an bhille/ráitis leictreachais a fhaigheann tú ó do sholáthróir leictreachais. Déanfaidh ESB Networks a chuid oibleagáidí reachtúla a chomhlíonadh agus liosta de na MPRNanna atá cláraithe le gach soláthraí ar na dátaí thuas a sholáthar chomh maith le €114.68 a thabhairt don soláthraí do gach MPRN ar a liosta.
Ina theannta sin, maidir leis na MPRNanna a shásaíonn na critéir i leith “leibhéal íseal úsáide”ar gach ceann de na dátaí éifeachtacha thuas, déanfaidh ESB Networks iad a mharcáil, mar atá leagtha amach san Acht um Chostais Leictreachais (Bearta Éigeandála) i leith Cuntais Tí, 2024. Maidir le MPRNanna atá cláraithe le ESB Networks mar MRPNanna a bhfuil cumas onnmhairiúcháin ag baint leo (micrighiniúint, mar shampla), atá cláraithe mar MPRNanna a bhfuil gnéithe leochaileacha ag baint leo, nó MPRNanna atá nasctha le méadar íoc-mar-a-úsáidtear i gcás cruatain de chuid ESB Networks agus atá ag obair i mód réamhíocaíochta, ní dhéanfar a leithéid a mharcáil mar mhéadair a bhfuil “leibhéal íseal úsáide” ag baint leo. Más MPRN é a bhfuil bratach leis go bhfuil “leibhéal íseal úsáide” ag baint leis, seans nach bhfaighidh an custaiméir sin creidmheas.
Is iad na soláthraithe leictreachais atá freagrach as a chinntiú go ndéantar an creidmheas a leithdháileadh ar an gcustaiméir atá cláraithe leis an MPRN. Ba cheart aon cheist a bhaineann le creidmheasanna a chur le cuntais aonair a chur chuig an soláthraí leictreachais a bhí cláraithe le d’uimhir MPRN ar na dátaí thuasluaite. Is féidir tuilleadh sonraí a fháil ar láithreán gréasáin do sholáthraí leictreachais.
Tá eolas úsáideach ar an dóigh a n-oibríonn an scéim, eolas ar chritéir incháilitheachta san áireamh, ar an treoir maidir le Scéim Sochair Éigeandála CRU le haghaidh costais leictreacha ar cru.ie agus ar leathanach ceisteanna coitianta CRU. Ba mhaith le ESB Networks a chur i gcuimhne do custaiméirí a bheith san airdeall ar iarrachtaí calaoiseacha ar fhioscaireacht a dhéanamh. Ní chuirfidh ESB Networks téacsteachtaireachtaí, glaonna nó ríomhphoist chugat riamh ina bhfuil nasc chuig leathanach logála isteach ar shuíomh gréasáin a iarrann ort sonraí pearsanta amhail sonraí bainc, paschóid aonuaire nó faisnéis phearsanta a roinnt.
Féach Iarrachtaí calaoiseacha ar fhioscaireacht le tuilleadh eolais a fháil.