Dáta Ullmhaithe na Léarscáile: an21 Meitheamh 2024
Céard is féidir liom a fhoghlaim ón léaráid?
- Is éard atá sa teasléarscáil ná léiriú ar an acmhainn atá ar fáil ó thaobh claochladán de ag leibhéal na bhfostáisiún agus ag gach leibhéal voltais do chustaiméirí éilimh nua agus do chustaiméirí giniúna nua araon. Léarscáil éasca le húsáid agus idirghníomhach í a léiríonn an méid éilimh nó ghiniúna a d’fhéadfaí a chur le fostáisiún gan obair threisithe. Cuireann sé ar chumas custaiméirí ionchasacha tuiscint níos fearr a fháil ar na háiteanna a bhféadfaidís nascadh.
- Sa léaráid, rangaítear na fostáisiúin ardvoltais ina dhá chatagóir de réir an voltais soláthair, i.e. 110kV, 38kV nó Meánvoltas (MV).
- Ar an léarscáil, rangaítear na fostáisiúin ardvoltais ina dhá chatagóir de réir an voltais soláthair, i.e. 38kV nó Meánvoltas.
- Tugtar ar an léarscáil freisin an áit a bhfuil gach fostáisiún meánvoltais/ísealvoltais 3 phas agus an acmhainn éilimh atá ar fáil ag na fostáisiúin sin.Bheadh na sonraí acmhainne ísealvoltais áisiúil do chustaiméirí atá ag iarraidh éileamh níos lú ná 500kVA a nascadh. Gnólachtaí beaga, feirmeoirí agus tionscadail bheaga phobail is mó a mbeadh spéis acu sa scála seo. Dá bhfreastalódh an acmhainn atá léirithe ar do chuid riachtanas, d’fhéadfá a bheith cinnte go leor nach mbeadh aon obair forbartha nua ag teastáil ar an bhfostáisiún. Bíodh sin mar atá, d'fhéadfadh mionsonraí a bhaineann go sonrach leis an láithreán, amhail a ghaireacht don fhostáisiún agus rochtain fhisiciúil air, teorainn a chur leis na féidearthachtaí go ginearálta.
- Ní shonraítear an acmhainn atá ar fáil i gcomhair giniúint ísealvoltais mar gheall ar na nithe eile a chaithfear a chur sa mheá a bhaineann go sonrach leis an láithreán, féach pointe Uimh. 5 thíos.
- Tá dathchódú ar na pionnaí ar an léarscáil de réir na raonta den acmhainn atá ar fáil, agus is féidir iad a scagadh astu féin. Is féidir scagadh a dhéanamh go neamhspleách de réir leibhéal voltais freisin.
Cén chaoi a mbeadh a fhios agam cén fostáisiún a bhaineann le mo láithreán?
- Molaimid duit an tAimsitheoir Suímh a úsáid ach cliceáil ar an deilbhín ar an taobh deas den léarscáil. Coinnigh súil amach don tsiombail seo:
. Anseo is féidir leat logainm nó éirchód a chlóscríobh isteach agus taispeánfar duit na stáisiúin is gaire don áit. Iarrtar ort a chinntiú go bhfuil na voltais nasctha agus na raonta ábhartha roghnaithe agat ar dtús faoi scagairí ar an taobh clé nó b’fhéidir nach bhfaighidh tú toradh ar bith. - I gcás fostáisiúin ísealvoltais, bain úsáid as an léarscáil le do láithreán a aimsiú agus ansin aimsigh an fostáisiún ísealvoltas is gaire dó. Is iondúil go gcaithfeadh an fostáisiún a bheith faoi 300m de do láithreán le bheith oiriúnach lena nascadh ag ísealvoltas, murach sin chaithfí fostáisiún nua a sholáthar níos gaire duit.Taispeántar chomh maith sa bhosca aníos an máthair-fhostáisiún ardvoltais a sholáthraíonn an fostáisiún ísealvoltais. Seiceáil cén chaoi a bhfuil acmhainn an mháthair-fhostáisiúin chomh maith.
- Maidir le nasc MV (níos mó ná nó cothrom le 500kVA) aimsigh an stáisiún ísealvoltais is gaire mar atá sonraithe sa mhír roimhe seo agus taispeánfar an mháthairacmhainn freisin.
An gciallaíonn an luach ‘Acmhainn atá ar Fáil’ gur féidir liom an méid sin a nascadh?
Ní gá go gciallódh. Tá go leor saincheisteanna a bhaineann go sonrach leis an láithreán agus seiceálacha teicniúla mionsonraithe nach mór a chomhlánú chun an dearbhú sin a thabhairt agus ní féidir iad sin a dhéanamh ach mar chuid d'iarratas. Seo thíos cuid de na tosca a mbíonn tionchar acu ar an bhfreagra:
- An mise an chéad duine a bhfuil iarratas déanta aige? Eisítear na tairiscintí nasctha uile ar bhonn ‘tiocfaidh do sheal mar a thiocfaidh tú féin’. Mar sin, tá an seans ann go ndearna custaiméir eile iarratas romhatsa agus go mbeidh cion den acmhainn a bhí ar fáil á úsáid aige nuair a thiocfaidh do sheal.
- Gaireacht don fhostáisiún: is gnách i gcás ísealvoltais go gcaithfidh tú a bheith faoi 300m den fhostáisiún agus i bhfad níos gaire dó más ag brath ar ardleibhéal acmhainne ísealvoltais a bheidh tú. Maidir le ciorcaid 38kV agus meánvoltais, ní féidir a bheith cinnte go mbeadh an acmhainn ann, agus d’fhéadfadh sé go gcaithfí línte nua a thógáil nó ceann atá ann cheana a uasghrádú sa chás sin.
- Uaireanta bíonn fostáisiúin ardvoltais ina máthairsholáthar d’fhostáisiúin iartheachtacha eile. I gcás go bhfuil acmhainn theoranta ag an máthair-fhostáisiún, beidh teorainn le hacmhainn gach mac-fhostátáin chomh maith. Ina theannta sin, mura mbaineann ach aon mhac-fhostáisiún amháin úsáid as an acmhainn ar fad atá ar fáil, ní bheidh aon acmhainn bhreise ar fáil do na mac-fhostáisiúin eile. Caithfear an cineál idirghníomhaíochta seo a choinneáil faoi bhreathnú ar bhonn leanúnach lena chinntiú nach rólódáiltear an córas.
- D’fhéadfadh idirghníomhaíocht den chineál céanna tarlú ar chiorcaid ar a bhfuil acmhainn ar fáil, mar dhea, ach nach féidir conradh a dhéanamh ina leith mar gheall ar mhéaduithe custaiméara ar chiorcaid eile a bhfuil foinse choiteann acu, rud a fhágann go bhfuil teorainn acmhainne leo go léir.
- Tá sé iontach deacair plé le giniúint, is cuma cén voltas atá i gceist, toisc gur beag is féidir a dhéanamh le freastal ar an ardú gaolmhar voltais. Bíonn géaréifeacht aige sin ar a ghaire a chaithfidh an láithreán a bheith d’fhostáisiún.
- Maidir le naisc ghiniúna ECP, d'fhéadfadh an acmhainn atá ar fáil a bheith difriúil ag brath ar cibé acu an nglacann custaiméir lena dtairiscintí staidéir nasctha nó an dtarraingíonn siad siar iad le linn gach baisce staidéir.
- Bíonn tionchar ag lóid shuaiteacha, amhail caochaíl agus astaíochtaí armónacha, ar an acmhainn atá ar fáil freisin.
- D’fhéadfadh an acmhainn a deirtear a bheith ar fáil bheith níos mó ná an rátáil uasta le haghaidh comhpháirt líonra aonair, mar shampla i gcás acmhainn chaighdeánach naisc ciorcaid. Ina leithéid de chásanna, is í an chomhpháirt líonra áirithe sin a chuirfidh teorainn le nasc aonair agus, dá bhrí sin, ní bheidh sé in ann leas a bhaint as an acmhainn iomlán a deirtear atá ar fáil.
Cén chaoi ar táirgeadh na sonraí?
Cuireadh na sonraí i dtoll a chéile de réir anailís bhunúsach ar an acmhainn chlaochladáin atá ar fáil, ar na lóid atá ann cheana agus ar na gealltanais chonarthacha atá tugtha do chustaiméirí nua. Níl san áireamh gnéithe mionsonraithe measúnaithe atá riachtanach le tairiscintí nasctha a eisiúint, amhail acmhainn ciorcad réamhtheachtach agus riachtanas teagmhais seirbhíse.
Céard air a bhfuil na figiúirí maidir leis an acmhainn atá ar fáil bunaithe?
- Acmhainn na stáisiún, mar a bhí Nollaig 2023.
- Tagann an fhaisnéis bhonnlódála ó Shainléamha Lóid 2023/2024, a n-áirítear leo Laglódáil an tSamhraidh 2023, a úsáidtear san obair ullmhúcháin maidir le hacmhainn ghiniúna.
- Tá san áireamh sa ríomh maidir le héileamh conarthaí agus tairiscintí éilimh suas go dtí an Meitheamh 2024
- Tá san áireamh sa ríomh maidir le giniúint conarthaí agus tairiscintí giniúna suas go dtí an an Meitheamh 2024
Cé chomh minic a dhéantar nuashonrú ar an Léarscáil Acmhainne Líonra?
Mar chuid de straitéis ESB Networks, is é an cuspóir atá ann an léarscáil a nuashonrú go ráithiúil.
An bhfuil suíomh na bhfostáisiún cruinn?
Níl i suíomh na bhfostáisiún ardvoltais ach treoir. Tá suíomh na bhfostáisiún meánvoltais/ísealvoltais beacht, áfach.
Cá fhad a thógann nasc?
I gcás go bhfuil go leor acmhainne ar fáil san fhostáisiún ardvoltais, ní bheidh i gceist le naisc mheánvoltais le huasleibhéal 10MVA a shuiteáil de ghnáth ach líonra nua línte lastuas nó cáblaí faoi thalamh a thógáil, chomh maith le hoibreacha sibhialta gaolmhara agus mionoibreacha ar an stáisiún féin a chur i gcrích. Is iondúil nach gá cead pleanála a fháil. Ní bheifí ag súil leis go dtógfadh a leithéid d’oibreacha níos mó ná 6-9 mí. Mar sin féin, thógfadh sé níos mó ama i gcás go mbeadh obair shuntasach de dhíth ar an stáisiún, amhail claochladán nua nó lascthrealamh meánvoltais a shuiteáil. B'fhéidir go mbeadh cead pleanála nó ceadanna eile riachtanacha ag teastáil chomh maith agus bheifí ag súil leis go dtógfadh an próiseas ar fad thart ar 2-3 bliana sa chás sin.
Is iondúil, áfach, gur féidir naisc ísealvoltais a chur i gcrích laistigh de 6 mhí ón iarratas.
Faisnéis maidir le nasc giniúna: An Beartas um Naisc Sheasmhacha (ECP)(esbnetworks.ie)
Céard iad na pointí tábhachtacha eile ba cheart a choinneáil i gcuimhne maidir leis na sonraí ar an léarscáil?
- Níl sa léarscáil ach treoir agus caithfear iarratas iomlán foirmiúil a dhéanamh leis an acmhainn líonra a dhéanamh amach i ndáiríre.
- Ní thugtar ar an léarscáil figiúirí acmhainne le haghaidh an naisc deiridh ón bhfostáisiún ardvoltais go háitreabh an chustaiméara. I gcás naisc den sórt sin, caithfear leas a bhaint as an líonra meánvoltais (10kV nó 20kV) atá ann cheana féin. Caithfear an-chuid rudaí a chur sa mheá le hacmhainn ar an líonra sin a dhéanamh amach agus is gá measúnú a dhéanamh dá bhrí sin.
- I roinnt cásanna, d'fhéadfadh sé go mbeadh conradh déanta cheana le custaiméirí aonair maidir leis an acmhainn atá ar fáil de réir na Léarscáile Éilimh ach nach bhfuil an acmhainn sin ar fad á húsáid acu faoi láthair.
- Ní féidir talamh slán a dhéanamh de go mbeadh an acmhainn chéanna ar fáil ar líonraí réamhtheachtacha an DSO fiú dá dtabharfadh an fhaisnéis sna Léarscáileanna Giniúna agus Éilimh le fios go mbeadh.
- Aon mhéadú ar an lód ar an gCóras Dáileacháin, beidh tionchar aige ar an gCóras Tarchurtha réamhtheachtach chomh maith agus d'fhéadfadh sé go mbeadh gá le hobair threisithe ar an gCóras Tarchurtha le freastal ar na lóid sin. Déanfaidh an TSO é sin a mheas ar leithligh.
- Ní féidir le nasc aonair a bheith níos mó ná acmhainn claochladáin aonair. I gcás 38kV agus meánvoltais, is éard atá san acmhainn a deirtear atá ar fáil ná iomlán na gclaochladán ar fad san fostáisiún sin ag an voltas iomchuí. I gcásanna áirithe mar sin, d’fhéadfadh sé go mbeadh ní ba mhó ná nasc amháin ag teastáil leis an acmhainn iomlán a úsáid. (Tabhair faoi deara nach gceadaítear níos mó ná nasc amháin a bheith ag áitreabh aonair).
