Agus an scéim i bhfeidhm, iarrfar ar úsáideoirí tráchtála leictreachais an t-éileamh a laghdú chun tacú leis an líonra dáileacháin agus athrú ó bhonn ar bun in Éirinn ar an dóigh a ndéantar leictreachas a ghiniúint, ó bhreosla iontaise ar mó a lorg carbóin go foinsí glana inathnuaite. Imeachtaí Laethúla a thugtar orthu, agus tá siad ann gach aon lá gnó (Luan go hAoine, seachas saoirí poiblí) ó 4:30 i.n. go 7.00 i.n. fad a mhairfidh an scéim. 

• Tá seans ann go mbeidh sé dúshlánach freastal ar an éileamh leictreachais uaireanta. Má tharlaíonn a leithéid, seans go bhfógrófar Buaic-Imeacht. Beidh Buaic-Imeacht le feiceáil san fhuinneog chéanna le hImeachtaí Laethúla. Gheobhaidh rannpháirtithe fógra, áfach, lena chur in iúl dóibh go mbeadh tábhacht faoi leith leis an éileamh a laghdú ar lá áirithe d’fhonn an líonra leictreachais a fheidhmiú, agus go mbeadh ráta íocaíochta ní b’airde i gceist. 

• Tá an scéim deartha le go bhfaighidh úsáideoirí tráchtála leictreachais íocaíochtaí as bearta éifeachtúlachta fuinnimh a chur i bhfeidhm agus an t-éileamh leictreachais a laghdú idir 4:30 i.n agus 7:00 i.n. ar laethanta oibre (Luan go hAoine, seachas saoirí poiblí), go speisialta nuair a fhógrófar Buaic-Imeacht, fad a mhairfidh an scéim. 

• B’fhearr dá ndéanfadh na húsáideoirí tráchtála leictreachais atá cáilithe athruithe oibriúcháin a thabhairt isteach a d’fhágfadh go bhféadfaidís an t-éileamh a laghdú go rialta le linn na tréimhse seirbhísí, don mhéid is mó d’imeachtaí laethúla agus buaic-imeachtaí agus ab fhéidir. Mar sin féin, aithníonn ESB Networks go mbíonn srianta agus dúshláin oibríochtúla ag baint le laghdú buan rialta a bhaint amach ar an úsáid laethúil fuinnimh.  Mar sin, is leis an gcustaiméir féin an rogha an t-éileamh a laghdú. Beidh an méid a íocfar leat bunaithe ar chomh minic is féidir leat an t-éileamh a laghdú agus ar chomh mór atá a laghdú sin. Lena chois sin, ní ghearrfar aon phionóis as gan aon laghdú a bhaint amach nó as leibhéal ísle a bhaint amach.

• I gcás úsáideoirí tráchtála leictreachais atá ag iarraidh páirt a ghlacadh agus a dhéanann na critéir cháilitheachta a shásamh, féadfaidh siad iarratas a dhéanamh mar chuid d’iarratas ó shainchuideachta bainistíochta fuinnimh (comhbhailitheoir, cuir i gcás) chun bheith ina Sócmhainn Seirbhíse Solúbthachta nó, mar mhalairt, iarratas a dhéanamh go díreach ar ESB Networks chun bheith mar Sholáthraí Seirbhíse Solúbthachta má bhíonn a láithreán méadraithe féin acu a bhfuil Uimhir Thagartha Mhéadarphointe (UTM) ag baint leis. Féadfaidh cuideachtaí bainistíochta fuinnimh Sócmhainní Seirbhíse Solúbthachta a fhostú agus ról a ghlacadh mar Sholáthraí Seirbhíse Solúbthachta.
• Tá Soláthraithe Seirbhíse Solúbthachta freagrach as Sócmhainní Seirbhíse Solúbthachta a bhainistiú agus cumarsáid a dhéanamh leo.  
• I gcás na n-iarratasóirí sin a n-éireoidh a n-iarratas leo agus a gheobhaidh conradh mar chuid de Beir Bua ar an mBuaic - Custaiméirí Gnó, déanfar bonnlíne a shocrú do Thréimhse an Gheimhridh agus, nuair is cuí, do Thréimhse an tSamhraidh do gach Sócmhainn Seirbhíse Solúbthachta (.i. UTM). Beidh an méid sin bunaithe ar shonraí faoin éileamh ón tréimhse is deireanaí a thabharfadh léiriú cuí agus a bheidh mar bhonn le go mbeifear in ann comparáid a dhéanamh idir an bonn sin agus an laghdú ar an leictreachas fad a bheidh an scéim i bhfeidhm.
• Mar chuid den iarratas, caithfidh Soláthraithe Seirbhíse Solúbthachta an Acmhainn Solúbthachta (MW) a leagan amach do gach Sócmhainn Seirbhíse Solúbthachta a bheidh á húsáid acu, an acmhainn sin le soláthar acu le linn Imeachtaí Laethúla agus Buaic-Imeachtaí. Caithfidh Sócmhainní Seirbhíse Solúbthachta pas a bhaint amach i dTástáil Chruthúnais i dtús na scéime lena léiriú go bhfuil siad in ann an Acmhainn Solúbthachta a bhaint amach de réir an chonartha.

• Agus gach Imeacht Laethúil nó Buaic-Imeacht thart, déanfar an t-éileamh ar leictreachas sa tréimhse sin bainteach le Sócmhainní Seirbhíse Solúbthachta an tSoláthraí Seirbhíse Solúbthachta a chur i gcomparáid lena mbonnlíne féin. Tabharfar íocaíocht dóibh as aon laghdú ar éileamh a bhainfear amach i gcomparáid leis an mbonnlíne sin. Ba chóir a thabhairt faoi deara nach dtugtar aon luach saothair as laghdú ar éileamh a bhaint amach a théann níos faide ná an acmhainn solúbthachta de réir an chonartha.
• I gcás Imeachtaí Laethúla: Gheobhaidh Sócmhainní Seirbhíse Solúbthachta íocaíocht de €340 ar a laghad an MWh laghdaithe, suas go €680 ar a mhéad an MWh.
• I gcás Buaic-Imeachtaí, gheobhaidh Sócmhainní Seirbhíse Solúbthachta íocaíocht €820 an MWh laghdaithe.
• Tá na rátaí íocaíochta bunaithe ar struchtúr chun Sócmhainní Seirbhíse Solúbthachta a spreagadh lena n-acmhainn chomhaontaithe solúbthachta a bhaint amach le linn imeachta agus chun tús áite a thabhairt do Bhuaic-Imeachtaí. D’fhéadfadh ESB Networks ordú a chur amach ó am go chéile chuig Soláthraí Seirbhíse Solúbthachta chun iarraidh orthu stop a chur leis an tseirbhís solúbthachta atá á soláthar ag an tSócmhainn Seirbhíse Solúbthachta má mheastar go bhféadfadh sé go mbeadh drochthionchar ag an tseirbhís sin ar an líonra. 
• I gcás go mbeadh 2 cheann nó níos mó de Shócmhainní Seirbhíse Solúbthachta cláraithe ag Soláthraí Seirbhíse Solúbthachta ar an scéim, gheofar íocaíocht aonuaire as gach Sócmhainn Seirbhíse Solúbthachta a úsáidtear, an méid sin ag brath ar acmhainn chonraithe solúbthachta na Sócmhainne Seirbhíse Solúbthachta. Déanfar gnáth-íocaíochtaí a ríomh bunaithe ar 50% de mhéid iomlán a n-íocaíochtaí dá Sócmhainn Seirbhíse Solúbthachta as an laghdú ar an éileamh dá bharr.
• Déanfar íocaíochtaí le Sócmhainní Seirbhíse Solúbthachta agus le Soláthraithe Seirbhíse Solúbthachta a phróiseáil leis an Soláthraí Seirbhíse Solúbthachta.

• Beidh aon úsáideoir tráchtála leictreachais a dhéanann iarratas agus a dhéanann na critéir incháilitheachta a shásamh le haghaidh Beir Bua ar an mBuaic - Custaiméirí Gnó incháilithe le páirt a ghlacadh sa scéim. Tá na critéir incháilitheachta i bhfeidhm bunaithe ar gach láithreán/UTM. Má tá níos mó ná láithreán amháin agat a dhéanann na critéir a chomhlíonadh, beidh agat le gach láithreán acu a chur san áireamh san iarratas.
• Le bheith incháilithe don scéim Beir Bua ar an mBuaic sa Ghnó, caithfidh Sócmhainní Seirbhíse Solúbthachta na nithe seo a chomhlíonadh:
• méadrú eatramh cuí i bhfeidhm acu gach ceathrú uaire ón 1 Deireadh Fómhair 2022 ar aghaidh. 
• an cumas acu laghdú ar an éileamh iompórtála a bhaint amach bunaithe ar a n-úsáid a athrú 
• nasc a bheith acu leis an gcóras leictreachais ar an leibhéal dáileacháin atá á fheidhmiú ag ESB Networks mar Oibreoir Córais Dáileacháin nó nasc acu leis an gcóras leictreachais ar an leibhéal tarchurtha atá á fheidhmiú ag EirGrid mar Oibreoir Córais Tarchurtha. 
• gan a gComhaontú Nasctha ná an Cód Dáileacháin a bheith á sárú acu má chuireann siad seirbhís solúbthachta ar fáil a gcuireann giniúint taobh thiar den mhéadar léi.
• Seiceálacha Giniúna Comhthreomhaire a shásamh, nuair is cuí.
• Seiceálacha bliantúla ar an Idirghníomhú Giniúna a shásamh chun bheith páirteach sa scéim i dTréimhse an tSamhraidh (1 Aibreán go dtí an 30 Meán Fómhair)
• I gcás Sócmhainní Seirbhíse Solúbthachta atá páirteach i margaí eile (cuir i gcás DS3, an Margadh Acmhainne, nó Treoirthionscadail eile de chuid Líonra Náisiúnta, Naisc Áitiúla), féadfaidh siad clárú ar Beir Bua ar an mBuaic do Chustaiméirí Tráchtála fosta.

• Sruth breise ioncaim – gheobhaidh tú íocaíocht as aon laghdú a bhainfidh tú amach ar an mbonnlíne agus aon imeacht bainteach le Beir Bua ar an mBuaic - Custaiméirí Gnó ann, suas leis an Acmhainn Solúbthachta de réir an chonartha. Níl aon phionóis ann. Mar shampla, má bhíonn Imeacht Laethúil ann, más 0.6MW an bhonnlíne atá leagtha síos duit agus más 0.2MW an Acmhainn Solúbthachta atá aontaithe agat, má éiríonn leat an t-éileamh ar leictreachas a laghdú go 0.4MW le linn na tréimhse seirbhíse 4:30 i.n. – 7.00 i.n., íocfar thú as sin. (0.6MW-0.4MW) x €680/MWh x 2.5 uair an chloig = €340 as an imeacht sin.Agus corradh le 300 Imeacht Laethúil ar fáil idir seo agus deireadh mhí an Mhárta 2025, beidh an méid a íocfar leat ag brath ar an laghdú a bhainfidh tú amach i ngach imeacht agus an líon imeachtaí ina mbeidh tú páirteach. 
• Laghdú ar chostas do chuid billí leictreachais de thairbhe laghdú a bhaint amach ar an úsáid. 
• Seans le laghdú a bhaint amach in astaíochtaí carbóin. Tá baint mhór uaireanta idir an t-am den lá a n-úsáidtear an leictreachas agus astaíochtaí CO2. Má úsáidtear leictreachas le linn na n-uaireanta ina mbíonn lorg carbóin na giniúna ar an leibhéal is ísle (is é sin taobh amuigh de na buaicuaireanta), seans go mbeadh laghdú ar astaíochtaí carbóin ann dá bharr. 
• Céim chun tosaigh atá ann i dtreo spriocanna inmheánacha a bhaint amach i dtaobh na hinbhuanaitheachta agus laghdú ar astaíochtaí carbóin. 

• Táthar ag glacadh le hiarratais anois ar an scéim Beir Bua ar an mBuaic - Custaiméirí Gnó. Is féidir é sin a dhéanamh anseo. Beifear in ann iarratas a dhéanamh go dtí an 6 Eanáir 2025, ach amháin má chuirtear síneadh leis an scéim.
• Tá ESB Networks ag tabhairt faoi chonarthaí le húsáideoirí tráchtála fuinnimh incháilithe agus le sainchuideachtaí bainistíochta fuinnimh (Comhbhailitheoirí, mar shampla). Más rud é gur úsáideoir tráchtála fuinnimh atá ionat a bhfuil taithí agat ar fhreagairt don éileamh a bhainistiú, seans gur mhaith leat iarratas a dhéanamh go díreach chuig ESB Networks (trí eTenders). Tá seans ann go mbeadh sé ina bhuntáiste ag úsáideoirí tráchtála fuinnimh eile sainchuideachta bainistíochta fuinnimh a úsáid.
• Tá i gceist ag ESB Networks sraith de sheimineáir ghréasáin a reáchtáil chun na mionsonraí a bhaineann le Beir Bua ar an mBuaic - Custaiméirí Gnó a shoiléiriú do gach páirtí leasmhar.  
• Más mian leat fógraí a fháil le go mbeidh tú in ann freastal ar sheimineáir ghréasáin amach anseo, níl le déanamh agat ach ríomhphost a chur chuig btp@esb.ie, an clár Beir Bua ar an mBuaic - Custaiméirí Gnó a lua, agus beidh an fhoireann Líonra Náisiúnta, Naisc Áitiúla i dteagmháil leat.
• Níl liosta de shainchuideachtaí bainistíochta fuinnimh faofa i bhfeidhm ag ESB Networks mar gheall ar rialacha iomaíochta. 

• Is tríd an tairseach ar eTenders (ar fáil ach cliceáil anseo) a dhéantar an próiseas iarratais, is cuma más iarratas go díreach ar ESB Networks atá i gceist chun bheith mar Sholáthraí Seirbhíse Solúbthachta nó más iarratas mar chuid d’iarratas ó shainchuideachta bainistíochta fuinnimh atá i gceist.